Հայաստանի մեծությամբ երկրորդ քաղաքը՝ Գյումրին, որն աչքի է ընկնում մշակութային ու թատերական կյանքի ակտիվությամբ, վերջին օրերին վերածվել է մեծ քաղաքական թատերաբեմի, իսկ «թատրոնը» դեռ շարունակվում է:
Բանն այն է, որ Գյումրու ՏԻՄ ընտրությունները դարձան հերթական առիթը, որպեսզի, այսպես ասած, «նախկինները» կրկին իրենց ուժերը չափեն գործող իշխանության հետ և կրկին «բաղձեն» վերադարձի մասին:
Վերադառնալու ճանապարհին նախկինները, իշխող ուժին թիրախավորելուց բացի, չեն մոռանում նաև սեփական տարաձայնությունների մասին: Մարտուն Գրիգորյան-Վարդան Ղուկասյան դուետն ամենաաչքի ընկնողն է՝ երբեմն նաև ոչ եթերային լեքսիկոնի առումով: Եվ հետո՝ երկուսին միավորում են նախկին «տերերը», մի դեպքում՝ Ռոբերտ Քոչարյանը, մյուս դեպքում՝ Սերժ Սարգսյանը, ու նաև այն, որ երկուսն էլ իրենց մերձավորների հետ միասին անցնում են ամենատարբեր վարույթներով, ինչը փորձում են փաթեթավորել քաղաքական հետապնդում եզրույթի տակ:
Ինչևէ, հենց այս երկուսից է կախված՝ Գյումրին կունենա՞ ընդդիմադիր համայնքապետ՝ նրանց կոալիցիայի արդյունքում, թե՞ կգնա ընտրության 2-րդ փուլի:
Արդյո՞ք կմիավորվեն Վարդան Ղուկասյանն ու Մարտուն Գրիգորյանը, և ո՞ւր կտանի նրանց միությունը, քաղաքագետ Լիլիթ Դալլաքյանը «Հայկական ժամանակ»-ի հետ զրույցում ասում է, որ թերահավատորեն է վերաբերվում նրանց միությանը՝ հաշվի առնելով ուժերի միջև եղած տարաձայնությունները:
Միաժամանակ քաղաքագետը նկատում է՝ որևէ պարագայում չպետք է թիրախավորել գյումրեցուն՝ ընտրողին, որովհետև ընտրության ամբողջ հանրագումարով Վարդան Ղուկասյանը ստացել է մոտ 10 տոկոս ձայն, ինչը, զրուցակցի կարծիքով, առավելություն չէ, հատկապես այն դեպքում, որ Ղուկասյանը տարիներ շարունակ եղել է քաղաքապետ և ունի, այսպես ասած, «շրջապատ»:
Քաղաքագետը ընդգծում է, որ Գյումրու ընտրություններին լոկալ չի վերաբերվում, այն ցույց տվեց, որ եթե օրվա իշխանությունները շարունակեն սև-սպիտակի քաղաքականությունը, ժողովուրդը կարող է ընտրել նախկին իշխանություններին՝ ելնելով բարկությունից:
Դալլաքյանի համոզմամբ՝ իշխանությունը պետք է կամք ունենա և անցնի աշխատանքի՝ առաջադրված մեղադրանքներն ապացուցի, որպեսզի անպատժելիությունը նման մարդկանց քաղաքական վերածնունդ չապահովի:
Առավել մանրամասն՝ ռեպորտաժում:
Նյութի աղբուր